LESARBREV: Ny regjering, nytt KrF-team
FrP har trekt seg ut av regjeringa og KrF, Venstre og Høyre sit no med meir styring over dei viktige oppgåvene i regjeringa sjølv. Me gler oss til å sjå kva denne nye situasjonen får å bety. Gleda er stor over at også Knut Arild Hareide no er del av den nye regjeringa! Me er eit svært godt og sterkt lag, om vi er små!
Det er trong for KrF meir enn nokon gong. Noreg treng eit parti som kjempar for sjølve menneskeverdet og for ein enklare kvardag for familiane. Eit sentrumsparti som vil bygge samfunnet nedanfrå, gjennom familiar, frivillige lag og organisasjonar, trussamfunn og eit godt, lokalt næringsliv. Fram mot valet i 2021 skal KrF jobba for familiebedriftene, gründarane og småbedriftene som tek ansvar for bygda.
Noreg treng eit parti som ser forbi systema, og som set enkeltmennesket i sentrum – i barnehagar, skule, helsevesen og eldreomsorga – ja, i all politikk. Eit parti som ser eldre som ein ressurs, og som set si æra i å skapa trygge og verdige omsorgstenester for dei som treng det. Noreg treng eit parti som faktisk har forvalteransvaret som sin grunnleggande idé og som konsekvent set dei minste, fattigaste og mest utsatte først – internasjonalt og her heime.
Me er er glade for at me er med på eit lag som konsekvent vil løfte desse perspektiva når viktig politikk for land og folk vert forma og lagt fram!
Kommunestyregruppa
Torbjørn Indrebø, Marita Husevåg Hellesen, Magne Steine
Styret i Suldal KrF
Jarle Haugsland, Torunn Vik, Svanhild Løge Skålheim, Magne Steine og Torbjørn Indrebø
