50 prosent billegare å feriera i Norge

For nordmenn har det vorte 50–60 prosent billigare å feriera i heimlandet enn å dra til utlandet, samanlikna med nokre år tilbake.

Aldri før har nordmenn reist like mykje i eige land som nå. Det heng saman med kronekurs og inflasjon, og er noko nordmenn kan spara mykje på, fortel Kyrre Knudsen, sjeføkonom i Sparebank 1 SR-Bank, til NRK.

Ikkje rigga for å handtera boomen som kjem

– Sett på spissen, kan ein seia at det har vorte dobbelt så dyrt for nordmenn å reisa til utlandet i forhold til for ti år sidan. Samtidig får utlendingar besøkja Norge til halv pris.

I 2013 kosta éin euro 7,8 norske kroner. I 2023 må me ut med 11,13 norske kroner. Prisveksten i landa som bruker euroen som valuta, var i mai på 6,1 prosent frå same månad i fjor. Prisstiginga (KPI) i Norge var i mai 6,7 prosent i forhold til for eitt år sidan.

Samtidig som dette gir eit godt høve for det norske reiselivet å oppleva ein oppgang, trur Knudsen det blir ei utfordring å få tak i nok tilsette når utanlandske sesongarbeidarar ikkje lengre får like godt betalt.

– Nordmenn med tilgang på faste, trygge og godt betalte jobbar vil i for liten grad jobba innan reiselivet. Me er derfor ikkje rigga for å handtera den turistboomen som kjem, seier han.

Spår for få utdanna

Reiselivsforskar og førsteamanuensis ved Universitetet i Stavanger, Åsa Helen Grahn, meiner mangelen på arbeidskraft frå utlandet viser at det er viktig å utdanna nordmenn innan reiseliv.

– Eg trur ein av våre største utfordringar i framtida vil vera for få utdanna folk, og dermed for dårleg kunnskap om korleis me byggjer eit robust og haldbart reiseliv.

(©NPK)