Solveig Ege Tengesdal (KrF) var fylkesordførar i sist periode og har arbeidd mykje med dei varsla hurtigbåt-kutta. I morgon skal samferdsleutvalet ha saka på sitt bord.

Om hurtigbåten: – Blir nøydde til å ta nokre kutt, men prøver å skjerma det mest sårbare

Det seier gruppeleiar i KrF, Solveig Ege Tengesdal, om dei føreslåtte hurtigbåt-kutta som nå skal til politisk behandling i fylkeskommunen.

Publisert Sist oppdatert

Fylkesrådmannens forslag, som blei kjent i veka som var, blir av suldalsordførar Gerd Helen Bø karakterisert som ei rasering av hurtigbåttilbodet i fjordane.

Står midt i forhandlingane

Ege Tengesdal var i sist periode fylkesordførar og har jobba mykje med saka. Ho seier ho og partiet tar saka på djupt alvor, men vil ikkje nå utdjupa kva ho legg i «det mest sårbare».

– Me står akkurat nå midt i forhandlingar om dette, og derfor vil eg ikkje vera meir spesifikk. Eg kan seia er at me legg opp til mindre kutt enn føreslått, men nokre må me nok ta, erkjenner ho.

Ein av få taparar

Rogaland fylkeskommune mister 80 millionar kroner i statleg finansiering av hurtigbåt-rutene, og er ein av veldig få fylkeskommunar som kjem dårlegare ut med den nye kostnadsnøkkelen departementet legg til grunn, der kystlinjekriteriet har fått større vekt. Det slår ikkje heldig ut for Ryfylkebassenget, der hurtigbåten går på kryss og tvers, meir som ein buss enn ein båt.

Ege Tengesdal seier ho i sist periode brukte mykje tid på beskriva problemet overfor nasjonale styresmakter. Utan å klara å endra kostnadsnøkkelen.

Forventar kompensasjon

– Den ser ut til å bli ståande, men me har på ingen måte gitt opp forventinga om ein type kompensasjon eller overgangsordningar for fylkeskommunar som blir råka av dette. Dette er også blitt tydeleg kommunisert inn frå ordførarane i dei kommunane det gjeld.

Samferdsleutvalet har saka i morgon

I morgon, onsdag, begynner dei dramatiske kuttforslaga si politiske behandlings-reise i samferdsleutvalet, før det kjem til fylkesutvalet og fylkestinget i desember.

– Forstår de som er nærare byen kva dette inneber for særleg indre del av Ryfylke?

– Det er klart at de som lever med konsekvensane på kroppen til vanleg, kjenner dette sterkast. Men Ryfylke har representantar på fylkestinget som tydeleg beskriv kva dette inneber for de som ligg lengst frå byen. Me tar dette på veldig alvor og prøver nå å få til mindre kutt i første omgang. Me ser på hurtigbåt-tilbodet som ei form for fylkesveg, seier Ege Tengesdal

Powered by Labrador CMS