Suldal står i fare for å mista hurtigbåten frå alle kaiar så nær som Hebnes frå 2023
– Ei rasering, fastslår ordførar Gerd Helen Bø etter å ha sett fylkerådmannens forslag som legg opp til å kutta 40 millionar kroner på hurtigbåt-tilbodet dei kommande fire åra.
Regjeringas nye kostnadsnøkkel for hurtigbåt og ferjetilbodet rammar Rogaland fylkeskommune knallhardt. Går det slik fylkesrådmannen legg opp til, i tråd med Kolumbus sine tilrådingar, betyr det at hurtigbåtens historie som livsnerve i Ryfylkebassenget i praksis er over.
Først spareknivar, så øks i 2023
Forslaget frå fylkesrådmannen legg opp til eit kutt-løp med 14 millionar kroner i innsparingar for dei to kommande åra, før den store øksa skal komma i 2023. Då vil dei fleste stader med fastlandsforbindelse mista hurtigbåten.
Skulle dette scenarioet bli verkelegheit, betyr det at Hebnes blir den einaste staden i Suldal som får hurtigbåtanløp.
– Kan ikkje akseptera forslaget
Suldalsordførar Gerd Helen Bø karakteriserer kuttforslaget i 2023 som ei rasering av tilbodet. – Dette er eit forslag me ikkje kan akseptera, seier ho, som saman med sine kollegaer i dei råka Ryfylke-kommunane, i går møtte samferdslepolitikarane i fylket for å seia si meining. Der var Bø klar på at buss er eit dårleg alternativ til båt på svingete, smale og rasutsette vegar, og ho etterlyste også konsekvensutgreiing for lokalsamfunna som blir råka.
Krev at Jelsa, ikkje Hebnes blir snuplassen
Hennar krav er å få utgreidd moglegheitene for ein mindre båt som kan gå frå for eksempel Jelsa og inn til Sand og vidare til Sauda, og å sjå på mindre bemanning av hurtigbåten og kva moglegheiter som ligg i alternative drivstoff. Ho krev også at dei gongene båten ikkje går inn fjorden, må Jelsa vera snuplassen.
Ho minna dei folkevalde på fylket om at hurtigbåten er den einaste offentlege kommunikasjonen mellom Suldal og Stavanger og at kutt både vil gå utover skuleungdom, studentar, pendlarar og eldre, og også Sauda vidaregåande skule.
– Har eit marginalt tilbod i dag
Ordføraren fryktar også kutta som som kan bli ein realitet alt frå neste år. I 2021 inneber dei å kutta alle avgangar mellom Nedstrand og Hebnes-Sandeid søndag og fredag. For 2022 å kutta avgangen Foreneset og Bogsund fredag og søndag. Saudaruta kan mista rundturen både laurdag og søndag.
– Me har eit marginalt tilbod og ønskjer ikkje at det vesle me har, blir fjerna, er ordførarens bøn til fylkespolitikarane. Også for desse kutta, som råkar både hyttefolk og skulelevar og indre ryfylkingar som ønskjer å ta hurtigbåten på dagstur til byen, etterlyser Bø konsekvensutgreiing.
Nå skal forslaget til politisk behandling, der dei folkevalde i samferdsleutvalet i fylket er først ut, og dei har sitt møte kommande onsdag.