Diskuterte samlingsplassane i dag, men har ikkje tatt noko avgjerd ennå

Dagens møte mellom rådmannen og einingsleiarane resulterte ikkje i noka sikker avgjerd om bruken av Kulturhuset og Suldal Bad. Men rådmann Øyvind Valen seier det mest sannsynleg blir ei eller anna form for avgrensing på bruken.

Må beslutta før helga
Han seier dei respektive leiarane nå jobbar vidare med spørsmålet og at morgondagen truleg vil bringa ei avklaring. – Det er jo helga som samlar mest folk, så i førekant av den, vil me måtta ha ei beslutning, seier han.
Når det gjeld Kulturhuset, gjeld kommunens beslutning om at arrangørar som samlar meir enn hundre, skriftleg må risikovurdera arrangementet.

Avbestiller leirskulen
Leirskulen er også ein stad som samlar mange som lever tett på kvarandre. Denne veka er suldalselevar på leirskule, og det er ikkje planar om å avbryta denne.
Men avbestillingane er alt begynt å komma frå eksterne skular som skulle vore der neste veke.

Ungdomsskulen
Ungdomsskulen på Sand samlar også mange unge, men det er per nå ikkje aktuelt å stenga den. – Det er rektor der som jobbar med dette, men eg reknar med at det ikkje er aktuelt å samla alle i gymsalen og liknande.