Førstegongsveljar Tom Van Ruiven (19) om politikk, Snap og ordførar-ryggrada

Tømrarlærlingen frå Sandsbygda veit at politikk er viktig, men tilstår nesten orsakande at den likevel kjennest litt kjedeleg og langt frå kvardagslivet.

19-åringen har nok å hengja fingrane i, med ein kvardag der læringarbeid hjå KV Bygg og forsvarsjobbing for Suldal A-lag er sentrale berebjelkar.

Han går under smilande tvil med på å ta ein prat med lokalavisa, der han denne dagen arbeider med å skifta vindauge.

Liv og røre

– Dette er første valet du kan stemma ved, og det er altså eit kommuneval. Er det heilt sjølvsagt for deg å bruka stemmeretten din, skal du stemma?

– Eg har ikkje akkurat site og venta hardt på det, haha, men eg skal stemma ja. Politikk er viktig, eg veit jo det, men eg har ikkje brukt mykje tid på å setja meg inn i dei forskjellige partia og meiningane. Men eg tenkjer å gjera det, ja.

At politikk er viktig, herskar det ingen tvil om hjå nittenåringen, og han meiner det aller viktigaste for Suldal er å sikra at det er liv og røre, aktivitet og arbeidsplassar. Og sjølvsagt rassikring. Rødsliane er umogleg å komma utanom, slår han fast.

Det kokar ned til folk

– Men det aller viktigaste, det det kokar ned til, er jo at her er folk. Politikarane kan sørga for å støtta idrettsanlegg og bra ting, men det nyttar ikkje med fancy anlegg, viss det ikkje er folk til å laga miljø, smiler han, som er svært nøgd med boltre-moglegheitene som har breia seg utover på Eide.

– Det siste som er komme på plass der, er frisbee-bane, veldig bra!, gir han tommel opp og skrøyter også av initiativet, som gjer at det nå blir utbygging av Prestavikjo og banen der på Suldalsosen.

– Politikarane kan støtta, men til sjuande og sist, handlar det om folk og dugnad!

Begeistra for industriplanar

Korleis få Suldal til å bli ein attraktiv stad for unge å slå seg ned og bli, er tusenkronersspørsmålet i ein fråflyttingstruga kommune, og Tom er glasklar på at arbeidsplassar er punkt nummer ein over alle andre.

Derfor er han ein av dei som er glad for industriplanane på Berakvam.

– Eg har ikkje sett meg djupt inn i det, men første reaksjon er: Veldig bra! Det skaper aktivitet, meiner han, som likevel har eit tillegg til begeistringa.

– Det er viktig at arbeidsfolka der blir ein del av Suldal og slår seg til her, at det ikkje berre blir pendlarar som bur i ein brakkerigg. At industrien der blir ein pluss for grendene, og då tenkjer eg først og fremst på dei minste.

Ryggrad til å stå i ting

Tom er også klar på at Suldal må vera Suldal og ikkje prøva og apa etter byen.

– Det verken kan me eller vil me. Då er jo ikkje Suldal Suldal, smiler han, som meiner det beste med heimkommunen er fjord, fjell og rom; rett og slett god plass.

– Tilbake litt til valet? Er det personen eller partiet som er viktig for deg, og veit du kven som er din føretrekte ordførarkandidat?

– Personen er det viktigaste. Meir enn partiet, ja. Eg veit ikkje endå kven som er min favoritt, men eg tenkjer at ein ordførar må ha ryggrad til å stå i ting når det tar på, at han eller ho må vera reflektert og kunna sjå fleire sider av ei sak.

Snap blir litt too much

– Korleis treff partia deg i din kvardag? Kor ønskjer du at dei snakkar til deg; vil du ha plakat på butikken, er det Facebook, stand eller Snap som gjeld? Eller ville du likt å få besøk heime?

– Haha, Snap trur eg hadde blitt litt too much; det er ikkje for å få politikk, eg går inn der. Facebook er ok, og det er fint med stand i Gata. Eg følgjer nok mest med på politikken via Suldalsposten. Heimebesøk, næh, det trur eg ikkje hadde funka så bra, hehe.

Dei må tora å gønna litt på

– Kan du sjå føre deg at du blir aktiv i politikken?

– Nei! Min første tanke er at du som politikar, står mykje i stormen, det er ikkje noko for meg. Eg tenkjer at dei gjer ein veldig viktig jobb, utan det arbeidet kunne ikkje Suldal gå rundt.

– Ditt råd til suldalspolitikarane framover?

– At dei tør å gønna litt på. Det er typisk suldalsk å vera litt forsiktig, og eg trur av og til me er litt for forsiktige.