Kommuneoverlegen ber om at unge er på vakt for korona-symptom

Etter utbrotet i Haugesund, der fem unge har fått påvist smitte, ber nå kommuneoverlege Harald Bjarne Hellesen om at unge i Suldal er på vakt.

I Haugesund har fem personar i alderen mellom 18 og 30 år testa positivt for covid-19 dei siste dagane, og kommuneoverlegen der Jostein Helgeland, seier i dag tysdag til Haugesunds Avis at dei fem nye smittetilfella kan vera starten på eit større utbrot, men at han trur og håpar dei skal klara å stoppa det. Fleire personar som har vore i nær kontakt med dei smitta er sett i karantene.

Ber dei unge ta kontakt

Kommuneoverlege Harald Bjarne Hellesen i Suldal seier det ikkje er utenkjeleg at det kan vera kontaktpunkt mellom dei smitta i Haugesund og innbyggjarar i Suldal.

– Yngre menneske må vera spesielt oppmerksame på luftvegs-symptom. Ein treng ikkje vera veldig sjuk, det er nok om det er lette symptom på forkjøling, seier han og ber om at unge mellom 15 og 30 år tar kontakt med legekontoret for vurdering av testing om dei har symptom.

Hellesen trur det kjem til å bli eit auka behov for testing framover på legekontoret, både frå bedrifter som vil testa sine tilsette og av turistar.

Tett oppfølging

Hellesen seier det ikkje er noko som tyder på at andre er smitta av vedkomande som fekk påvist infeksjon i Suldal 26. juni.

Dette er konklusjonen etter at dei har hatt oppfølging med testar og andre undersøkingar for å sjå om dei som hadde vore i kontakt med vedkomande har blitt smitta. Sannsynlegvis har personen med koronavirusinfeksjon blitt smitta utanfor kommunen, og det vil truleg ikkje vera mogleg å finna ut kor smitten kom frå.

Totalt har Suldal kommune testa i underkant av 200 personar for koronavirusinfeksjon, og ein av desse har altså testa positivt.