Alan Walker tar Nesflaten ut i verda

I natt kjem første smakebit frå Nesflaten og innspelinga den verdskjende Alan Walker, DJ og musikkprodusent, gjorde der i slutten av juni.

– Eg har ein mistanke om at dette vil bli spektakulært, seier ein godt nøgd Olav Lindseth, som nå ventar på at heile innspelinga blir lagt ut om nokre veker.

Konsert for India

I natt, norsk tid, er Alan Walker del av eit stort lag av topp-artistar frå USA og India som spelar støttekonsert for å samla inn pengar til kampen mot covid-19 i India. Det er altså på denne konserten at eit glimt av Nesflaten, cirka tre og eit halvt minutt, først blir vist. Heile produksjonen, ein medley av hans mest kjende låtar, der både Julie Bergan og Torine er med på vokal, blir først lansert om nokre veker.

Natur og arkitektur

Fantastisk natur og sprek arkitektur ligg bak når norsk/britiske Alan Walker, ein av dei største på sitt felt, vel seg Nesflaten som location for innspelinga, meiner Lindseth som hadde gleda av å vera vertskap for fleire av stjernene på Energihotellet.

– Det var ein stor produksjon med rundt 50 involverte, proffe dansarar, lys og lyd som i Oslo Spektrum, fortel hotellsjefen nøgd.

Grunna smitteutbrotet som var i kommunen då innspelinga fann stad, valde produksjonen å halda ein låg profil for ikkje å samla for mange. Mange nesbuer og røldøler fekk likevel ein kveld dei seint vil gløyma, både som publikum og statistar.

Langsiktig verdi

Lindseth rosar Hydro og Lyse for måten dei har stilt opp på og lagt til rette for innspelinga på kort varsel. Musikkvideoen er spelt inn både inne i driftssentralen og utanfor og i tunellopninga.

– Det ser veldig bra ut, forsikrar Lindseth som har fått sett litt av videoen. Han minner om den langsiktige verdien ein slik innspeling har og seier at det ikkje er første gong det har vore interesse for Nesflaten nasjonalt og internasjonalt som lokasjon.

– Sjå berre til Odda. Fleire internasjonale produksjonar ser til Vestlandet, her har me eit stort potensiale, ivrar han.