Sommarvikar i Suldalsposten

Tina Totland Jenssen (30) er frå Karmøy, men er godt kjent på Sand og i juli skal ho dekkja Suldal for lokalavisa.

Ho kjem til sommarvikariatet med ein rykande fersk bachelor i samanliknande politikk, men også med ei alt opparbeidd stor glede over både penn og kamera. Og tipset om at det var opning for eit vikariat i lokalavisa inst i fjorden, fekk ho av tante, som er journalist i same avis.

Har vore mykje på Sand

– Eg likar å skriva, ja og er veldig glad i å fotografera. Eg har vore mykje på Sand, og Suldal er ein nydeleg stad med mange flotte motiv. Dermed er det både ein fin sjanse til å prøva ut skrivinga og eit eldorado for kamera på fritida også, smiler ho, som ikkje ser vekk frå at også levebrødet vidare vil handla om noko i formidlingsbransjen.