Storfangst i Suldalsvatnet

Det blei eit ganske uvanleg fiske for BG Suldal i Suldalsvatnet i går.


Meldt stolen i 2002
For mens arbeidet med å strekkja englandskabelen til Kvilldal, frå Hylsfjorden via Djupevik, går for fullt, måtte arbeidsgjengen i går også fiska opp eit bilvrak. Og doningen det er snakk om, er ingen anonym NN.
Bilen har lenge lege rett under vassflata i Djupevik, og Volvoen av type 940 SE, blei i 2002 meldt stolen frå Haugesund.
Kor lenge den har lege i Suldalsvatnet er ukjent, men når den nå kom i vegen for arbeidet med kabelen, blei det bilfiske.
Politiet, som også var tilstades i Djupevik i går, har meldt funnet vidare til forsikringsselskapet, opplyser dei.
Ifølgje folk som var tilstades i går, ligg det ytterlegare ein bil i vatnet, men om den også kjem til å bli landfast nå, visste ikkje dei avisa snakka med.