Vatn i springen igjen
Vass-trøbbel på Sand:
OPPDATERT KL. 15.02
Ein glad VA-leiar Erling Rognskog kan annonsera at vatnet nå er tilbake i springen hjå abonnentane, og han fortel om gode opplevingar med velvilje og arbeidsmoral etter at leidninga sprakk lekk i går kveld. – Berre velvilje over heile linja, folk har stått på og hjelpt til, takkar Rognskog. Det var rett før klokka 23 måndag kveld at lekkasjen var eit faktum, og då stilte to av kommunens folk ut og arbeidde fram til kl.01.30 for å få til ei mellombels løysing.
OPPDATERT KL.09.00
Håper å skaffa vatnet tilbake i dag
Reparasjonsarbeidet er i gang, og det er klart at heile Maleniusvegen må gravast opp, rundt hundre meter frå krysset. Den som vil ut eller inn med bil, må få dette gjort før kl.09.30 nå i dag, etter dette blir vegen stengt. Det opplyser Erling Rognskog ved kommunens VA-avdeling. Han håper at folk skal ha normal vassforsyning tilbake i løpet av dagen, men torer ikkje tidfesta nærare når det kan bli.
Rundt ti husstander må henta og koka vatn, dei andre berørte har fått mellombels løysing, og desse siste treng ikkje koka vatnet før dei drikk det.
Brotet på hovudvassleidninga i byggjefeltet på Sand blei oppdaga av ein privatperson i går kveld, Rognskog seier det formeleg var snakk om ein bekk der. Leidninga er frå 1970-talet, og Rognskog seier grunnen til brotet kan vera spenn på leidninga eller liknande.
Må henta vatn
Brot på hovudvassleidninga som forsyner blant anna Maleniusåsen og Levaråsen på Sand, gjer at ein del av abonnentane nå må henta vatn i ein tank kommunen har plassert i nabolaget og koka vatnet før det kan drikkast.
Delar av abonnentane har kommunen klart å ordna ei mellombels forsyning til mens ein nå i morgontimane har begynt reparasjonsarbeidet. Kommunen har sendt ut ei tekstmelding til berørte innbyggjarar med detaljert beskjed om kor brotet går, kven som altså nå må ut og henta vatn og koka det. Det er dei som bur i Levaråsen og lenger ned som er berørte av dette. Kommunens VA-avdeling skriv at tanken der vatnet kan hentast er plassert i krysset ved Gardland. Suldalsposten har ikkje lukkast å få meir informasjonen om bakgrunnen for leidningsbrotet eller kva framdrift kommunen reknar med på utbetringa, men følgjer saka vidare i dag.
