20 sommarspørsmål

Silje Bråtveit, 24 år og bur på Nesflaten og jobbar på Hydro Energi. Ho har alt hatt nokre ferieturar, som til Svalbard og Budapest og skal stort sett jobba i sommar.

Nemn tre ting som får deg i sommarstemning
– Sol, varme og lukta av grillmat, det høyrer med.

Kva vil du visa fram av Suldal til ein som er her for første gong?
– Viss eg hadde fått slikt besøk, så hadde eg tatt dei med og vist dei naturen her i øvre Suldal, som til dømes Nipe, Bleskestadmoen og Finnabu.

Din favoritt-sommarmat
– Det må bli flintsteik på grillen. Saman med fløytegratinerte poteter og ein god salat.

Føretrekkjer du fjord eller fjell om sommaren?
– Fjell. Det er fjell eg er oppvaksen med. Det er det som er sommaren for meg.

Beskriv deg sjølv med tre ord
– Glad, smilande og ein smule rar. Søstrene mine meiner eg er rar og kanskje folk generelt meiner det også. Eg kan få litt rare innfall.

Sommar er høgsesong for festivalar. Kva festival ville du reist på om du fritt kunne velja?
– Eg trur eg ville reist på Coachella i California. Det er ein popmusikkfestival som blir arrangert i april. Der er det mange kjende artistar med. Ja, muleg eg ein gong reiser på den.

Eit sommarminne
– Kvart år, då eg var yngre, ferierte me på stølen til onkelen min på Finnabu. Eg brydde meg ikkje om å reisa til Syden. Kravet mitt var ei veka på Finnabu. Ikkje straum eller innlagt vatn. Og for oss ungane var det fritt fram. Me fiska, med båt på vatnet, og gjekk tur til Grubbedalen. Og så var det Yatzy og kortspel. Som familie kom me tett innpå kvarandre.

Kor drøymer du om å reisa?
– Eg kunne tenkt meg å utforska Sør-Amerika og Asia. Kjærasten og eg planlegg å bruka ein til to månadar på ei slik reise. Å kunna ta seg tid og mellom anna reisa i landa Vietnam, Kambodsja, Thailand og Kina. For nokre år sidan fekk eg eit slikt skrapekart, og etter det har eg blitt litt hekta. Eg har vore i Afrika og USA, og så har eg studert eit halvt år i Australia.

Sommarlektyre?
– Nei, eg les ikkje noko akkurat nå. Eg får finna meg ei bok for sommaren.

Din sommarsong nummer ein?
– En solskinnsdag av Postgirobygget. Den har eg på sommarspelelista mi.

Kva er for deg ein perfekt sommardag?
– At det er sol og varmt og kunna spela fotball eller volleyball saman med venner. Og så avslutta dagen med grilling. Den stemninga med å ha det kjekt i lag med fleire.

Finaste badeplassen i Suldal.
– Det må bli utebassenget her på Nes eller ein kulp i Stølsåna.

Dersom du fekk bestemma, kva er det første du ville ha gjort noko med i kommunen?
– Då ville eg ha auka fokus på mental helse i skulen. Det meiner eg er viktig, at dei unge får læra om kva som skjer inne i hovudet deira. Me hadde lite om dette då eg gjekk på skulen.

Kva er det mest impulsive du har gjort?
– Eg er ikkje impulsiv, eigentleg. Men for to år sidan, då eg sat her på jobb ein fredag og det regna, fekk eg ei melding frå ei venninne som var på countryfestival i Seljord. Der var det sol. Eg hadde 30 minutt på meg til å komma meg heim, pakka og nå bussen. Det klarte eg akkurat. Helga vart veldig kjekk.

Kva overskrift vil du helst sjå på framsida av avisa i sommar?
– Melding om sol og varme heile sommaren!

Beste oppleving i Suldal?
– Det er litt vanskeleg å svara på. Men eg trur det må bli då eg gjorde comeback i skikarusellen nå i vinter. Det var kjekt og spennande. Det var ni år sidan sist eg gjekk det. Eg hadde tenkt, og trena meg opp, for å gå i fjor, men hausten før vart eg sjuk. At eg i vinter var frisk igjen til å gå langrenn, var difor ekstra kjekt.

Beste turtips i Suldal?
– Å gå turen Mostøl - Krossvatn - Steinkilen og så tilbake til Mostøl. Ein fin helgetur.

Kva skal du gjera i sommar?
– Jobba og så skal eg ei veke på hyttetur i Hardanger.

Er det noko du ikkje likar med sommaren?
– Klegg, mygg og andre bugs.

Kven vil du gi ein blomebukett og kvifor?
– Det må bli til mi eldste søster. Ho står alltid med opne armar, er ei fantastisk mor for sine to barn og i tillegg kjempar ein urettferdig kamp mot kreften.