Min favorittfjelltur

Marianne Sandvik, Erfjord
– Åh, det er så mange! Må det vera i Suldal? Gunlanuten (829 moh) er fin og så ser eg heim frå den. Det er ein veldig fine tur. Eg køyrer av ved Foss, på riksvegen ut til Jøsneset. Frå der skogsvegen sluttar og opp til toppen brukar eg rundt halvanna time. Stien opp er godt merka. Frå toppen er det kjempefin utsikt. Rett nedanfor varden er det eit platå kor det er fint å campa. Tenna bål, noko godt i glaset og overnatta. Eg har lege der i soveposen og både solnedgang og soloppgang er nydeleg. Der ser ein også utover til Stavanger.

 

Per Even Tjøstheim, Suldalsosen
– Det er mange fine fjellturar. Eg vel meg til turen til Steinkilen i Dyraheio. Eit fint område og plass. Terrenget der, både med at det er så pass kuppert og særeige landskap. Frå avstand kan landskapet der sjå goldt ut, men på nært haldt er det mange frodige stader klemt innimellom. Som å gå ned Leirdalen mot Gravetjørna. Og så tykkjer eg at det er artig at det er så langt aust mot Bykle og at det ligg i vêrskiljet. Det er ei roleg hei, langt frå veg og så er det lite mobildekning der. Frå Bråtveit brukar eg rundt fem timar, frå Skreivassdammen tre-fire timar inn.

 

 Lars Ove Fjetland, Ropeidhalvøya – Det må bli Grytenuten (862 moh), som er en passleg lang tur. Turen tar mellom halvannan til tre timar opp, og halvparten ned igjen. Alt etter tempoet ein går i. Frå toppen ser ein veldig langt, i mange retningar, som Stavanger, Bokn, Folgefonna og fjellrekkja i Suldalsheia, sjølv om det ikkje er så lett å skilja toppane frå kvarandre. Eg likar også at ein kan gå til Grytenuten frå fleire stader på Ropeidhalvøya, kortast er det frå Kjølvikstølen og er ein tur som også passar for dei yngre. Det er mange høgdemeter som skal tilbakeleggjast, 800 meter opp.
– Ein bør vera oppmerksam på at vêret kan snu og at sjølv om det er fint når ein startar kan det blåsa godt på toppen.

 

Kirsten Hiim, Sand
– Det er meste ikkje muleg å velja berre ein. Kan eg seia Suldalsheia?, viss ikkje må det bli turen frå Mosvatnet over Skardsheia, så til Båsabudalen, ned til Vasstøl og til Hiimsvatnet. Denne turen er ein gammal favoritt og er fin både vinter og sommar. Den er variert og lett, bortsett frå ned Hedlestølskaret. I Båsabudalen er det knallfint. Nokre snur i Hedlestølskaret, men det er juks, ler ho.
– Eg likar toppar og blir dradd mot dei. Om ein vil, kan ein gå via Skardnuten ( 901 moh) på denne turen. Til denne turen ville eg sett av heile dagen. Den er ikkje merka, så ein må ha med kart og kompass.

 

Jarle Nilssen, Sand
– Hellandsnuten (747 moh)! Eg er programforplikta til å seia den, ler sandbuen som har gått turen eit utal gonger og merka stien opp til nuten.
– Jo brattare, jo betre. Det er slik eg likar det og at ein går frå fjord til fjell. Den er sentrumsnær for turistar som kjem her og frå toppen ser ein ned til Sand sentrum. Det som også er fint er at ein ikkje treng å gå same vegen ned att. Alternativa ned er til dømes via Hellandstølen, Brommelandskardet, Hanakamstølen eller til Augnastølsvatnet og vidare til Vidvei. I år har Nilssen vore litt over ti turar til toppen og brukar rundt halvanna time tur retur frå Kløv.

 

Ellen Kalvig, Suldalsosen
– Eg held ein knapp på Væting. Det er ei stjerna. Då går eg opp frå Helganes, det er kjekkast å kunne gå heimanfrå. Første del er på skogsveg og eg brukar rundt to timar opp. Ein fin tur å gå til på kvelden, gjerne ein sommarkveld. Ein kan også køyra til Saurdal og gå den merka turistforeiningsstien. Væting er ein kvelve med gardsstølar som høyrer til gardar på Helganes, Berge og Tjordal. Mine gamle aner har stølt på Væting i si tid, men nå står berre murane att etter den staden.
Vidare frå Væting kan ein gå kor ein vil, som til Dyraheio og Stranddalen. Elles så er det fin mange andre stader i Suldal.

 

Elin Berekvam Steine, Nesflaten
– Det er fleire å velja mellom. I Steinkilen er det fint. Men eg vel meg Skyvassnuten (1421 moh), den ligg eit par hundre meter inn i Bykle kommune. Ein køyrer til Bleskestad og vidare opp til Sandvatnet og parkerer der. Frå der går ein opp og innover Såtedalen. Ja, første delen er bratt, men det likar eg.
– Det er veldig fint terreng og frå toppen har ein godt utsikt i alle retningar, mot Hovden aust og Vassdalseggja som også er veldig fin tur.
Vegen opp er ikkje merka, så å ha kart med på turen er eit godt råd frå Steine som brukar rundt halvanna time opp. – Vinterstid, på ski, går ein til nuten frå Bleskestad, men eg likar best å gå på føtene sommartid.

 



Arild Vaage, Suldalsosen
– Ein tur som er fine og litt spesiell er å ta båt ut Hylsfjorden til Lingvong-land. Gå den fine vegen opp til høgaste, forbi garden og så gå innover. Ovanom Skiftesjuvet og til Hellestølen der me overnattar ei natt. Stølen ligg på rundt 800 meter over havet. Neste dag går ein så til Liastølen og ned til Vaage.
Første biten i båt, ut fjorden, er fin om vêret er fint. Deretter er det ein fin gangveg opp til Lingvong der det er mura flott. Ein har også fin utsikt til Sand og Ropeid Hestafjellet (933 moh). Frå Liastølen og ned til Våge er det bratt og einvega, som me seier. Ein må ha med seg kart om ei skal gå denne turen.

Marta-Brit Lunde/ Foto: Privat