Lakseflaks
Hadde Andreas Vårvik flaks eller berre ufatteleg fiskelukke? Det er ikkje godt å seia.
Denne saka stod på trykk 6. desember 2006
For kva skal ein tru når ein gut på 10 år lokkar fire laksar på kroken i ein snipp snare, på under 20 kast? Og dreg dei i land ein etter ein på Førlandsneset. Til armen var så gåen at Andreas meinte fire laksar fekk vera nok då ein ny sværing viste seg fram i hølen.
Artikkelen held fram under annonsen.
Stamlaksar
Fire flotte stamlaksar som skal delta i oppbygginga av laksestamma. Og dei aller første laksane Andreas har landa nokon gong i.
– Kva gjorde du for å få så mange fiskar til å bita på kroken?
– Det veit eg ikkje heilt. Eg heiv berre uti. Så beit dei på. Det handlar nok berre om flaks!
På rett plass til rett tid
Slik snakkar ein ekte stam-laksefiskar frå Suldal; ein som har vassa i barnestøvlar langs elvebreidda etter far sin, Øyvind Vårvik. Senior har saktens også fanga fire laksar på ein dag, men aldri i ein jafs, fortel han, synleg stolt over sonen. Sjølv om konklusjonen er nøktern; Andreas var på rett plass til rett tid. For i dagane før hadde fleire forsøkt seg på all fisken dei såg på elva, utan å få napp.
– Var forholda spesielle akkurat denne stunda?
– Nei, ikkje det eg kan seia. Mange ting spelar inn for om fisken er på bitet, men heldigvis finn me aldri heilt utav det, meiner dagleg leiar i Suldal elveeigarlag. Som under sonen sin fiskefest aldri fekk tid til å løysa sluken. Det gjorde ikkje det slag.