Yrkesval: – Det var beintøft, men det gløymde eg fort når meistringskjensla tok over
Aleksander Torsteinbø skulte seg til befal i Forsvaret. Her sprengde han eigne grenser og fekk kjenna på eit unikt fellesskap medan han sikra seg ei attraktiv leiarutdanning.
Torsdag er det yrkes -og utdanningmessa for Suldal og Sauda, denne gongen i Sauda. Me tok ein prat med sandbuen, som for tida studerer til maskiningeniør ved NTNU i Trondheim.
– Forsvaret treng folk i alle ledd, dette er ein unik sjanse eg meiner fleire bør få auga opp for.
Bu og eta gratis
Året var 2016 og han var nettopp ferdig med rekruttperioden i Madlaleiren i Stavanger. Her hadde han funne seg godt til rette i eit miljø prega av orden og struktur. At han slapp grubla på husleige og mathandel, var ein kjær bonus. Det gjorde at han kunne konsentrera seg fullt og heilt om oppgåvene som skulle løysast.
– Den gong kunne me gå rett i utdanning etter rekrutten, og eg bestemde meg raskt for å prøva meg på befalsskuleutdanninga.
– Forsvaret treng folk i alle ledd, dette er ein unik sjanse eg meiner fleire bør få aug opp for.
Beintøft
Aleksander reiste austover og på Sessvollmoen venta opptaksprøvane. Her skulle dei som var best kvalifiserte for leiarutdanninga, lukast ut. Dei blei testa både i teori og praksis før det heile enda i ein stor øvelse.
– Det var beintøft, men det gløymde eg fort når meistringskjensla tok over. Det var stort å klara det!
På Kjevik venta eit intensivt befalsstudium som heldigvis bestod av både teori og praksis. Akkurat det, er ein god kombinasjon han meiner Forsvaret er gode på.
– Det gjer det enklare å komma gjennom dei tyngste og lengste dagane når variasjonen er så stor, seier han.
Dyrka fram det beste i kvar
Etter utdanninga venta eit halvt års læretid. Her gjekk han rett inn som befal. Akkurat det, var litt spesielt for han som nettopp var rekrutt sjølv, men det gjekk seg til. Aleksander fortel om ei heilt spesiell lagskjensle ein ikkje finn andre stadar:
– I Forsvaret har du alltid nokon som heiar på deg og vil at du skal lukkast uansett kor i systemet du er. Dei pakkar deg i tryggleik slik at du vågar meir og får betre tru på deg sjølv og såleis utfører ein betre jobb. Det er ekstremt motiverande å dyrka fram det beste i kvart individ slik at ein saman byggjer ei gruppe med eit kollektivt tankesett.
Strengt i starten
– Korleis var det sosiale livet i leiren?
– Det er lagt opp til at det er ganske strengt i starten. Då er ein litt låst i leiren. Dette er for å byggja ein god kultur basert på samhald. Men så løyser det seg litt meir opp. Då ventar både kvelds- og helgeperm.
Det tidlegare befalet snakkar varmt om samhaldet og meiner det er viktig at ein melder seg på i det sosiale laget frå start.
– Det er kanskje spesielt viktig dei dagane ein er sliten og aller helst har lyst til å strekkja seg ut på senga i kasernen etter endt dag. Då er det fort gjort å bli liggjande, spøkjer han.
Superbonus
Aleksander har ikkje trega på valet sitt. Han meiner at dei utfordringane han fekk bryna seg på i Forsvaret har endra han. Han forklarar det slik:
– Du får ein kjempemoglegheit til å bli kjent med deg sjølv på ein heilt annan måte enn i det sivile livet. Det er ein vekst eg ikkje ville vore forutan, dessutan har eg nå ei attraktiv og nyttig utdanning, og som ein superbonus har eg fått vener for livet. Det blir ikkje så mykje betre enn det.