Rektor er godt nøgd med siste nytt frå fylkestinget

Det som til nå har vore eit prøveprosjekt ved Sauda Vgs, opplæringstilbodet yrkes- og studiekompetanse (YSK), var nyleg på bordet til fylkestinget.

Etter ein fire-årig prøveperiode blir pilotprosjektet nå eit fast tilbod ved Sauda vidaregåande skule innanfor utdanningsprogrammet Teknologi- og industrifag. Det vil òg bli oppretta eit YSK-tilbod ved Dalane vidaregående skule frå og med neste skuleår.

– Veldig nøgde

Rektor ved Sauda vidaregåande skule, Bård Børresen Lien, er nøgd med vedtaket frå fylkeskommunen:

– Me er veldig nøgde med vedtaket som nå er gjort i fylkeskommunen. Både vidareføringa av tilbodet som er etablert ved skulen her i Sauda, og at det blir oppretta eit nytt tilbod ved Dalane. Det styrkar tilbodet vårt, og medfører at YSK-modellen blir meir kjend for allmennheita.

Næringslivet har vore pådrivarar

Tor Helge Hilmarsen, dagleg leiar ved Norsk Stein Jelsa, er også glad for at YSK-løpet nå er blitt eit fast tilbod:

– YSK-løpet er ei kjempefin moglegheit for dei som ønskjer seg eit alternativt studieløp, der ein får både teori og praksis, seier Hilmarsen og held fram:

– Me har vore store pådrivarar for denne modellen både nå og i oppstartsfasen, og me har gjeve tilbakemeldingar til politikarane om at her er det liv laga. Derfor synest me det er kjempefint, rett og slett.

Fylkeskommunen som vedtar

I sluttrapporten frå prøveperioden blir det skildra ønske om at YSK-modellen blei gjort tilgjengeleg med utgangspunkt i fleire fag enn det som er nå. På spørsmål om det kan bli aktuelt å utvida tilbodet ved Sauda vidaregåande skule, svarer rektor Lien slik:

– YSK-tilbodet som er blitt etablert i Rogaland har komme i stand etter at tydelige behov er blitt meldt frå næringslivet. I seinare tid er det blitt meldt inn ønske om å sjå på løysingar for YSK-modellen også i andre utdanningsprogram, blant anna innanfor helse. Me er positivt innstilte. Me er ikkje i gang med å planleggja for dette nå, men er klare for å sjå på løysingar også her. Tilbodsstrukturen er det til sjuande og sist Rogaland fylkeskommune som vedtar.

YSK i Suldal

Det tverrfaglege studietilbodet ved Sauda vidaregåande skule har blitt teke godt i mot, og det har i løpet av dei fire åra i prøveperioden vore totalt 44 YSK-elevar ved skulen. Tre bedrifter i Suldal har vore med i programmet; Norsk Stein med sju elevar, Statkraft med ein elev og Hydro/Statkraft Energi med ein elev. Dei utgjer tre av totalt 22 lære-bedrifter i Rogaland som har vore med i pilotprosjektet.