Ikkje lett å vita kva ein skal bli
Suldalsposten fekk møte fem ungdommar frå Sand skule. Dei har gjort seg ein del tankar om kva som kan vera kjekt å driva med, men å seia heilt sikkert kva ein skal bli, det er ikkje lett.
Denne uka skal alle fem på yrkesmessa i Suldalshallen. I det høvet har me spurt kva dei ønskjer å arbeida med i framtida.
Dei er alle mellom 14 og 16 år, og synest det er litt tidleg å veta heilt sikkert kva dei skal bli. På spørsmål om kva yrke dei drøymer om, er nokre sikrare enn andre.
Frå tannlege til bonde
– Eg vil bli tannlege eller jobba med økonomi, seier Asrar Yasin Ahmed.
For Julie Mikkelsen Laugaland er det ikkje heilt sikkert, men volleyball er ei stor interesse, kanskje kan det vera ein veg å gå.
Daniel Bakka dyrkar også interessa si –langrenn. Han kunne tenkja seg å vera langrennsløpar og kanskje etter kvart bonde i Suldal. Magnus Lunde Hoftun nemner også bondeyrket som ein moglegheit, mens Thomas Steine kunne tenkja seg å bli lastebilsjåfør.
Også andre yrke dukkar opp i samtalen. Kanskje er det kjekt å vera møbelsnikkar? Eller jobba i tømrarbedrift?
Mange vil jobba og bu i Suldal – men by er også spanande
Dei får også spørsmål om kor dei kunne tenkja seg å jobba.
– Vil de vera her i Suldal? Vil de til andre stader i Norge og kva med utlandet?
– Eg vil jobbe i Suldal, seier Thomas Steine med sikker stemme.
Julie Mikkelsen Laugaland og Magnus Lunde Hoftun seier seg einig med han. Daniel Bakka kunne tenkja seg å flytta ut for å bli betre til å gå på ski, men ønskjer seg også tilbake igjen.
– Det hadde vore kjekt å bu i ein stor by, seier Asrar Yasin Ahmed om sine tankar om bustad i framtida. Ho kan tenkja seg å flytta ut for å ta høgare utdanning.
Nye og gamle draumar
– Hadde dykk same yrkesdraum som barn?
– Nei, eg hugsar at eg ville bli politi, fortel Julie Mikkelsen Laugaland. Det er ikkje noko ho kan tenkja seg lengre.
For Asrar Yasin Ahmed og Thomas Steine står barndomsdraumen fortsatt høgt i kurs.
– Eg har hatt lyst til å køyra lastebil så lenge eg kan hugse, seier Steine.
– Å bli tannlege begynte eg å tenkja på i tredjeklasse, så den tanken dukka tidleg opp, fortel Ahmed.
Treng ikkje bestemma seg nett nå
Heldigvis har dei fem ungdommane god tid til både å bestemma og å ombestemma seg. Dei synest sjølv det er tidleg å veta akkurat kva ein skal bli. Kanskje dukkar det også opp nokre interessante yrke på messa på torsdag.