Bli med inn på den populære yrkes- og utdanningsmessa!
Aldri før har næringslivet vore kjappare ute med å melda seg på Yrkes-og utdanningsmessa, noko Marit Larsen i Næringshagen i Ryfylke tek som eit teikn på at arenaen er særs attraktiv.
Blant både ungdommane og dei vaksne som stod på stand, var det berre godord å høyra.
Tømrarutdanning
På standen til KV Bygg Suldal tek Tom van Ruiven og Elias Gundersen i mot, og Daniel Bakka er innom for ein prat. Sistnemnde ler og fortel at han var i avisa og snakka om vidare utdanning her om dagen.
Då kom det fram at 15-åringen helst kunne tenkja seg å bli langrennsløpar og kanskje, etter kvart, bonde i Suldal. Tømrarane på standen har ingen problem med å framsnakka yrket sitt og meiner det er mange gode grunnar til å bli tømrar. Dei har kjekke og varierte arbeidskvardagar i lag med gode kollegaer og, ikkje minst, er det lett å få jobb når fagbrevet er i boks.
Kva med ein jobb i kyrkja?
På standen til den Norske Kyrkja står Asbjørn Finnbakk i god drøs med Peter Veggeland og Josef Ulset frå Sand. Finnbakk har med seg ei lang liste over aktuelle jobbar som finst i kyrkja.
— Det er ikkje berre prestar som jobbar i kyrkja, smiler diakonen frå Stavanger.
Josef finn mykje av det Finnbakk fortel interessant og kan godt tenkja seg ein av dei nemnde jobbane. Han lurer samstundes på kva ein kateket er, eitt av yrka på lista.
— Ein kateket jobbar med konfirmantundervisning.
Peter er ikkje like sikker på om ei framtid innan kyrkja er for han og fortel at han er ganske sikker på at det blir Lundeneset vidaregåande skule til neste år, med sal, service og reiseliv på timeplanen.
Tre tiandeklassingar og skuleval
Lise Nøstbakken, Tiril Myhr Åmås og Ingrid Vela har vore rundt og kikka på alle standane. Dei meiner Lundeneset vidaregåande skule, Universitetet i Stavanger og BI kjem best ut når dei blir bedne om å rangera. Tiril er usikker på kor og kva ho vil søkja til neste skuleår, men trur ho kjem til å velja noko som gir studiekompetanse. Lise har bestemt seg for å setja kursen nordover til Sogn og Fjordane. Der ventar internatskule og studiespesialisering. For Ingrid står valet mellom Stavanger og Sauda, KDA (kunst, design og arkitektur) og studiespesialisering.
— Nå må me kjempa vidare for YSK
På standen til Sauda vidaregåande skule står rektor Dag Bjønnes i lag med tre som snart er ferdige med YSK-løpet. Rektoren er sjølvsagt glad for at tilbodet nå blir redda i siste liten av fleirtalspartia på fylket. Men han er klar på at det ikkje kan vera noka kvilepute.
— Nå har me ein jobb å gjera, både skulen, kommunane og næringslivet, for å oppretthalda dette gode tilbodet.
God kombo av jobb og skule
Dei tre som snart er ferdige på YSK-linja (linja som gir både yrkes- og studiekompetanse), angrar ikkje på linjevalet sitt.
— Å få vera ute i jobb samtidig med at me går på skule, er fantastisk. Den komboen likar me godt, og så er det ikkje feil at me får betalt i læretida, meiner dei tre.
Nå ventar snart militærteneste for Kaspar, dei to andre vil kombinera jobb og nettstudiar til hausten.
Deler student-erfaringar
Emma Bakker og Cindy Mora kosar seg på standen til Universitetet i Stavanger. Dei er imponerte over at så mange av elevane dei har hatt besøk, har hatt så klare meiningar om kva dei skal bli. Emma er i gang med ein master innan energimiljø og samfunn, og Cindy studerer til byggingeniør. På messa har dei fått vist fram dei ulike faga universitetet tilbyr, men kjekkast av alt har det vore å få delt erfaringar om korleis livet som student eigentleg er.
Delte lærling-erfaringar
Paulius Santockis frå Sand er energimontør-lærling, og Espen Vold frå Suldalsosen er industrimekanikar-lærling. Denne dagen står dei på stand for arbeidsgjevaren Statkraft.
— Dei som kjem innom, er interesserte i å høyra kva me gjer som lærlingar, fortel Espen.
Han skal ta fagbrev til våren og deler meir enn gjerne frå erfaringane sine. Å vera lærling i Statkraft betyr varierte arbeidsoppgåver, og det er noko dei to lærlingane set stor pris på. Ein arbeidsdag kan innehalda både linjesynfaring på mastene, synfaring av bekkeinntak, arbeid på dammane ved Blåsjø, snømålingar og arbeid inne på kraftstasjonane. Om somrane har dei mykje utearbeid, og det er heller ikkje feil.
Rett ut i jobb
Vanlegvis har Statkraft i Prestavikjo to lærlingar i arbeid. Når dei startar som lærling, får dei 30 prosent av ei fagarbeidarløn, og siste halvåret før fagbrev, er dei oppe i 80 prosent. Espen er godt nøgd med det og humrar godt når han fortel at det i tillegg løner seg å bu heime. Kva planane er vidare etter at fagbrevet er sikra, er han litt usikker på.
— Eg skal ikkje i militæret, så planen er å gå rett ut i jobb. Eg likar veldig godt å jobba innan vasskraft, men det hadde vore kjekt å fått prøva ut noko nytt også. Det verkar spennande å flytta ut av kommunen og å jobba med noko eg ikkje har prøvd endå, meiner lærlingen frå Suldalsosen.
Lærling-kollega Paulius frå Sand har endå to år igjen i læretida før han treng å leggja jobb-planar.